Во присуство на бројна публика, тактилната изложба „Еден час“ гостуваше во заедничките простории на две велешки здруженија, Здружение на слепи лица и Здружение на глуви и наглуви. Во публиката беа и волонтерите од општинската организација на Црвениот крст. Поминавме пријатен еден час во разговор и презентација на предметите кои се претставени во изложбата. Зборувавме за еврејската култура, традиција, обичаи преку десетте предмети обработени како тактилни слики и придружени со текст на Брајово писмо. Добиените информации предизвикаа големо интересирање, па за да станат работите уште појасани и да се добијат повеќе информации за населувањето, животот и геноцидот во Втората светска војна врз Евреите на овие простори, договоривме следна средба во Меморијалниот центар.

Голема благодарност до секретарот на Здружението на слепи лица на општина Велес - Тони Пајдаков кој го овозможи гостувањето на изложбата „Еден час“ во Велес.

Изложбата е сопственост на Меморијалниот центар на холокаустот на Евреите од Македонија, а проектот - Патувачка изложба е финансиски поддржан од Фондот на холокаустот на Евреите од Македонија.